Меркі ауданындағы №11971 әскери бөлімінде жас сарбаздардың Отан алдындағы әскери ант қабылдауына арналған салтанатты шара ұйымдастырылды. Іс-шараға Меркі ауданы әкімінің орынбасары Ернар Әбілдаев қатысып, жас әскери қызметкерлерді маңызды күнмен құттықтады. Ол әскери қызмет – әр азамат үшін зор жауапкершілік екенін атап өтіп, сарбаздардың ел сенімін абыроймен ақтайтынына сенім білдірді.
Оңтүстік өңірлік қолбасшылығы әскерлері қолбасшысының штаб бастығының орынбасары, полковник Нұрлыхан Сатбаевич Ерекешов өз сөзінде ант қабылдау – әрбір жігіттің өміріндегі ерекше әрі тарихи сәт екенін айтты. Ол қарулы күштер қатарына қосылған сарбаздар мен олардың ата-аналарын қуанышқа толы мерекелі күнмен құттықтап, жауынгерлік жолдары сәтті болуын тіледі.
Сарымолдаев ауылдық округі ардагерлер кеңесінің төрағасы Хамиддолла Еңсебеков жас буынға ақ батасын беріп, олардың абыроймен қызмет етіп, аман-есен елге оралуын тіледі. Сонымен бірге салтанатқа қатысқан сарбаздардың ата-аналары да өз перзенттеріне жүрекжарды тілектерін жолдап, олардың алдағы әскери өміріне демеу болды.
Рәсім соңында сарбаздар саптық дайындық элементтерін көрсетіп, әскери шеберліктерін паш етті. Шара қонақтары олардың тәртібі мен дайындығына жоғары баға беріп, жас жауынгерлердің алдағы қызметіне сәттілік тіледі. Осындай маңызды рәсімдер жас сарбаздардың бойына рух, патриоттық сезім және елге қызмет етуге деген жігер береді.
