Біз кз

«ПСИХОАКТИВТІ ЗАТТАРҒА ТӘУЕЛДІЛІК» ТАҚЫРЫБЫНДА ПСИХОЛОГИЯЛЫҚ-ПРОФИЛАКТИКАЛЫҚ ІС-ШАРА ЖҮРГІЗІЛДІ

Жамбыл облысы бойынша ҚАЖД №58 мекеме психологтары мен «Жамбыл облысы әкімдігінің денсаулық сақтау басқармасы» Жамбыл облыстық психикалық денсаулық орталығының психолог мамандары Л.Г. Ли және А.А. Темербекова қатысып, карантин бөліміндегі сотталғандармен бірлескен түсіндіру және психологиялық қолдау жұмыстарын жүргізді.

Қазіргі таңда психоактивті заттарға тәуелділік қоғамдағы өзекті әлеуметтік-психологиялық мәселелердің бірі болып табылады. Әсіресе, бас бостандығынан айыру орындарындағы арнайы контингент арасында есірткі, алкоголь және басқа да психоактивті заттарды қолдану салдарынан туындайтын тәуелділік мәселесі ерекше назар аударуды қажет етеді.

Психоактивті заттарға тәуелділік – адамның психикалық жағдайына, мінез-құлқына, ойлау қабілетіне және әлеуметтік қарым-қатынасына кері әсерін тигізетін күрделі құбылыс. Мұндай тәуелділік адамның өзін-өзі бақылау қабілетін төмендетіп, ашушаңдық, мазасыздық, күйзеліс, агрессивті мінез-құлық және әлеуметтік ортаға бейімделу қиындықтарын туындатуы мүмкін. Арнайы контингент арасында тәуелділіктің қалыптасуына әртүрлі факторлар әсер етеді. Олардың қатарында отбасылық қиындықтар, әлеуметтік ортаның ықпалы, психологиялық күйзелістер, өмірлік қиын жағдайларды еңсере алмау, жағымсыз әдеттер және психологиялық тұрақсыздық бар. Осыған байланысты мекеме психологының негізгі міндеттерінің бірі – сотталғандар арасында психоактивті заттарды қолданудың алдын алу, тәуелділікке бейім тұлғаларды анықтау және олардың психологиялық жағдайын тұрақтандыруға бағытталған жұмыстар жүргізу. Сонымен қатар тәуелділіктің адам ағзасына, психикасына және болашақ өміріне тигізетін кері әсерлері туралы ақпарат берілді. Психологиялық тренингтер кезінде қатысушыларға өз эмоцияларын басқару, күйзелісті жеңу, жағымсыз ойлардан арылу, ерік-жігерді нығайту және қиын жағдайларда дұрыс шешім қабылдау дағдылары үйретілді. Сондай-ақ салауатты өмір салтын ұстанудың және зиянды әдеттерден бас тартудың маңыздылығы түсіндірілді.

Қорытындылай келе, психоактивті заттарға тәуелділіктің алдын алу – сотталғандардың психологиялық жағдайын жақсартуға, құқық бұзушылықтың қайталану қаупін төмендетуге және қоғамға қайта бейімделуіне ықпал ететін маңызды бағыттардың бірі. Аталған іс-шараның негізгі мақсаты – тәуелділіктің алдын алу, психологиялық тұрақтылықты қалыптастыру және әрбір адамның өмірге деген сенімін нығайту. Тренинг соңында сотталғандар кері байланыс жасап өз ойларын ашық білдіріп, жағымды әсер алғанын айтып өтті.

Leave A Reply

Your email address will not be published.