Жамбыл облысының әкімі Ербол Қарашөкеев ветеринария саласының қазіргі жай-күйі, атқарылып жатқан жұмыстар мен алдағы кезеңге арналған міндеттерді талқылау мақсатында арнайы кеңес өткізді. Жиында өңірдегі ветеринариялық ахуал, ауыл шаруашылығы жануарлары арасында жұқпалы аурулардың алдын алу, мал басын есепке алу және ветеринариялық инфрақұрылымды дамыту мәселелері кеңінен қаралды.
Кеңес барысында облыстық ветеринария басқармасының басшысы Бақыт Бетбаев 2026 жылға жоспарланған ветеринариялық-профилактикалық іс-шаралардың орындалу барысы туралы баяндады. Оның айтуынша, өңірде жануарлардың саулығын сақтау, жұқпалы аурулардың таралуына жол бермеу және ветеринариялық қауіпсіздікті қамтамасыз ету бағытында кешенді жұмыстар жүргізілуде.
Атап айтқанда, биыл ауыл шаруашылығы жануарларын 12 түрлі жұқпалы аурудан қорғау мақсатында 16,3 миллион доза вакцина егу жоспарланған. Сонымен қатар бруцеллез ауруын анықтау үшін 5,3 миллион диагностикалық манипуляция жүргізу көзделген. Қазіргі уақытқа дейін жоспарланған жұмыстардың басым бөлігі орындалған. Жыл басынан бері жануарларға 14,5 миллион вакцина егілсе, бруцеллезге қатысты 5 миллион диагностикалық зерттеу жұмысы атқарылған.
Қабылданған алдын алу шараларының нәтижесінде қазіргі таңда облыс аумағында жануарлар арасында аса қауіпті жұқпалы аурулар тіркелмеген. Бұл ветеринариялық қызметтердің тұрақты бақылауы мен профилактикалық жұмыстардың жүйелі жүргізіліп жатқанын көрсетеді.
Мал басын есепке алу және ауыл шаруашылығы жануарларын бірдейлендіру жұмыстары да назардан тыс қалған жоқ. Биыл өңір бойынша 1 миллион 327 мың 694 төлді бірдейлендіріп, тиісті дерекқорға енгізу жоспарланған. Бүгінгі күнге дейін 1 миллион 234 мың 972 төл қамтылып, жоспар 97,6 пайызға орындалды. Бұл бағыттағы жұмыстарды белгіленген мерзімде толық аяқтау көзделіп отыр.
Мал шаруашылығындағы ветеринариялық қауіпсіздікті қамтамасыз ету үшін эндемиялық аймаққа жататын 42 елді мекенде залалсыздандыру шаралары жүргізілген. Аталған жұмыстар аясында 24 мың 329 қора-жай, буферлік аймақтың 142 мың шаршы метр аумағы және 472 мың жануар арнайы өңдеуден өтті. Мұндай профилактикалық шаралар жұқпалы аурулардың таралу қаупін төмендетіп, елді мекендердегі санитариялық жағдайды жақсартуға мүмкіндік береді.
Сонымен қатар ветеринариялық стансалардың материалдық-техникалық базасын нығайту және қызмет көрсету сапасын арттыру бағытында да бірқатар оң өзгерістер бар. Атап айтқанда, ақылы қызмет көрсету есебінен түсетін қаражат көлемі артып келеді. 2026 жылы 160 миллион теңгенің ақылы қызметін көрсету жоспарланған. Бүгінгі таңда бұл көрсеткіш 140,2 миллион теңгеге жетіп, жоспардың едәуір бөлігі орындалған.
Түскен қаражат ветеринариялық мекемелердің жұмысын жақсартуға және мамандардың қажетті құрал-жабдықтармен қамтамасыз етілуіне бағытталуда. Осы қаражат есебінен аудандардағы ветеринариялық пункттерге 156 компьютер және ветеринариялық препараттарды белгіленген температуралық режимде сақтауға арналған 156 тоңазытқыш сатып алынған. Бұдан бөлек, қалған қаражат есебінен аудандық ветеринариялық бөлімдерді 10 Chevrolet Cobalt маркалы қызметтік автокөлікпен қамтамасыз ету жоспарланып отыр. Бұл мамандардың елді мекендерге жедел жетуіне, далалық жұмыстарды уақытылы жүргізуіне және ветеринариялық қызметтің қолжетімділігін арттыруға ықпал етпек.
Кеңесте облыс әкімі Ербол Қарашөкеев ветеринария саласының ауыл шаруашылығы үшін ғана емес, жалпы қоғамдық денсаулық пен санитариялық қауіпсіздік үшін де стратегиялық маңызға ие екенін атап өтті. Өйткені мал арасында жұқпалы аурулардың алдын алу, ветеринариялық талаптардың сақталуы және сапалы ет өнімдерінің нарыққа шығарылуын бақылау халықтың денсаулығына тікелей әсер етеді.
Өңір басшысы жауапты басқармалар мен мекемелерге ветеринариялық іс-шаралардың орындалу сапасына баса мән беруді тапсырды. Атап айтқанда, төлдерді бірдейлендіру мен вакцинациялау жұмыстарын белгіленген жоспарға сәйкес толық аяқтау, ветеринариялық дерекқордағы мәліметтерді нақты мал басымен салыстырып, ондағы ақпараттың өзектілігі мен дұрыстығын қамтамасыз ету міндеттелді.
Сондай-ақ келесі жылға арналған ветеринариялық-профилактикалық іс-шаралардың жоспарын алдын ала пысықтап, қажетті жұмыстарды уақытылы ұйымдастыру қажеттігі айтылды. Аса қауіпті жұқпалы аурулардың алдын алу бағытындағы бақылауды әлсіретпей, ветеринариялық шаралардың тиімділігін арттыру тапсырылды. Бұдан бөлек, мал сою орындары мен ет өнімдерін сату нысандарындағы ветеринариялық-санитариялық талаптардың сақталуына бақылауды күшейту жөнінде нақты міндеттер жүктелді.
Облыс әкімі саладағы жұмыстардың тек сандық көрсеткіштермен шектелмеуі керектігін айтып, әрбір бағыт бойынша нақты нәтижеге қол жеткізудің маңыздылығына тоқталды. Әсіресе мал басын есепке алу кезінде деректердің шынайылығын қамтамасыз ету, профилактикалық шараларды уақытылы жүргізу және ветеринариялық қызметтердің материалдық-техникалық мүмкіндіктерін одан әрі жақсарту басты назарда болуы тиіс.
Кеңес қорытындысында Ербол Қарашөкеев жауапты мекемелерге белгіленген тапсырмалардың орындалуын қамтамасыз етіп, ветеринария саласындағы өзекті мәселелерді шешу бойынша нақты шаралар қабылдауды міндеттеді. Өңір басшысы ветеринариялық қауіпсіздікті сақтау бағытындағы жұмыстар тұрақты бақылауда болуы керектігін атап өтті.