Жамбыл облысының әкімі Ербол Қарашөкеев Тараз қаласындағы бірқатар маңызды құрылыс және инфрақұрылым нысандарын аралап, жүзеге асырылып жатқан жобалардың орындалу барысымен танысты. Жұмыс сапары барысында өңір басшысы жылу жүйелерін жаңғырту, қала аумақтарын абаттандыру және тұрғындарға қолайлы орта қалыптастыру бағытында атқарылып жатқан жұмыстардың сапасына ерекше назар аударды. Сонымен қатар жауапты сала басшылары мен мердігер ұйым өкілдеріне нақты тапсырмалар беріп, қолға алынған жобалардың белгіленген мерзімде әрі сапалы аяқталуын қамтамасыз етуді міндеттеді.
Алдымен облыс әкімі Қонаев және Сейфуллин көшелерінің бойында орналасқан М-3 жылу магистралін қайта жаңғырту жұмыстарымен танысты. Аталған жоба облыс орталығындағы жылумен қамту жүйесінің сенімділігін арттыруға бағытталған маңызды инфрақұрылымдық бастамалардың бірі болып табылады. Мамандардың мәліметінше, қазіргі уақытта қайта жаңғырту жұмыстарының басым бөлігі аяқталған. Жоба аясында ұзақ жылдар бойы пайдаланылған және тозу деңгейі 65 пайызға жеткен құбырлар кезең-кезеңімен жаңартылуда.
М-3 жылу магистралін жаңғырту жұмыстары аяқталғаннан кейін тұрғын үйлер мен әлеуметтік нысандарды жылумен қамтамасыз ету сапасы едәуір жақсарып, жылу энергиясын тасымалдау кезінде орын алатын шығын көлемі азаяды деп күтілуде. Сонымен қатар апаттық жағдайлардың алдын алуға және жылу жүйесінің үздіксіз жұмыс істеуіне мүмкіндік туады.
Нысанды аралау барысында Ербол Қарашөкеев мердігер ұйымдардың жұмыс қарқынын күшейтіп, жобаның әр кезеңін тұрақты бақылауда ұстау қажеттігін атап өтті. Өңір басшысы құрылыс жұмыстары жүргізіліп жатқан аумақтарда тұрғындардың күнделікті өміріне барынша қолайлы жағдай жасау керектігін айтты. Осыған байланысты Қонаев көшесінің жөндеу жұмыстары аяқталған бөліктерін мүмкіндігінше қысқа мерзімде көлік қозғалысына ашу жөнінде тапсырма берілді.
Сондай-ақ облыс әкімі тұрғындармен кері байланысты күшейтудің маңыздылығына тоқталып, жөндеу жұмыстарының мерзімі мен кезеңдері туралы халықты тұрақты түрде хабардар етіп отыруды тапсырды. Оның айтуынша, кез келген инфрақұрылымдық жобаның басты мақсаты – тұрғындардың өмір сүру сапасын жақсарту. Сондықтан құрылыс жұмыстары барысында туындайтын уақытша қолайсыздықтар жөнінде халыққа толық әрі ашық ақпарат берілуі қажет.
Өңір басшысы құрылыс аяқталғаннан кейін жол жабындысын, тротуарларды және абаттандыру элементтерін сапалы қалпына келтіру мәселесіне де ерекше назар аударды. Ол мердігер ұйымдарға атқарылған жұмыстардың сапасына толық жауапкершілікпен қарауды және барлық нысандарды талапқа сай жағдайда пайдалануға беруді тапсырды.
Жұмыс сапары аясында Ербол Қарашөкеев қала аумағын абаттандыру және санитарлық тазалықты сақтау бағытындағы жұмыстармен де танысты. Осы орайда облыс әкімі «Жайлау» шағынауданындағы №13 тұрғын үйдің маңында орналасқан сквердің жай-күйін көріп шықты. Тексеру барысында аумақта шөптердің шамадан тыс өсіп кеткені және күтім жұмыстарының жеткіліксіз жүргізіліп жатқаны анықталды.
Аймақ басшысы жауапты мекемелерге «Таза Қазақстан» республикалық экологиялық акциясы аясында сквер аумағын толық ретке келтіріп, санитарлық тазалық жұмыстарын күшейтуді тапсырды. Сонымен қатар жаз мезгілінде қураған шөптердің өрт қаупін арттыратынын атап өтіп, бұл мәселеге немқұрайлы қарауға болмайтынын жеткізді. Оның айтуынша, қоғамдық орындардың таза әрі қауіпсіз болуы тұрғындардың өмір сүру сапасына тікелей әсер етеді.
Бұдан кейін облыс әкімі «Самал» (7) және «Алатау» (8) шағынаудандарындағы ішкі кварталдық жылу желілерін қайта жаңғырту жұмыстарының барысымен танысты. Қазіргі уақытта аталған шағынаудандардағы жылу құбырларының тозу деңгейі 75 пайызға жеткен. Осыған байланысты жылу желілерін толық жаңарту мақсатында кешенді жұмыстар жүргізілуде.
Мамандардың мәліметінше, қайта жаңғырту жобасы аяқталғаннан кейін жылу жүйесінің тиімділігі артып, тұрғындарға көрсетілетін коммуналдық қызметтердің сапасы жақсарады. Сонымен қатар жылу желілеріндегі апаттық жағдайлардың саны азайып, қыс мезгіліндегі тұрақты жылумен қамту мәселесі оң шешімін табады.
Жобаны іске асыруға байланысты аталған шағынаудандарда ыстық су беру уақытша тоқтатылған. Осыған байланысты облыс әкімі жауапты тұлғаларға құрылыс жұмыстарын белгіленген мерзімде әрі сапалы аяқтауды тапсырды. Сондай-ақ дайын болған учаскелер бойынша тұрғындарға ыстық суды кезең-кезеңімен беруді ұйымдастыру қажеттігін атап өтті.
Ербол Қарашөкеев құрылыс жұмыстары жүргізіліп жатқан аумақтарда тұрғындардың қауіпсіздігі мен қолайлылығы бірінші кезекте ескерілуі тиіс екенін айтты. Осыған байланысты жаяу жүргіншілердің қозғалысына, тұрғын үйлердің аулаларына кіруге және автокөліктердің еркін қатынауына кедергі келтірмеу жөнінде нақты тапсырмалар жүктелді.
Жұмыс сапарының соңында облыс әкімі «Астана» 12-шағынауданындағы №9 және №10 көпқабатты тұрғын үйлердің аулаларын абаттандыру жұмыстарының барысымен танысты. Мұнда балалар мен жастардың бос уақытын тиімді өткізуіне арналған заманауи спорт алаңшасы салынып, аула аумағын көркейту жұмыстары жүргізілуде.
Өңір басшысы жаңадан салынған спорт алаңшасының сапасына назар аударып, нысанды қысқа мерзім ішінде тұрғындардың игілігіне пайдалануға беруді тапсырды. Сонымен қатар Мемлекет басшысының балалардың қауіпсіздігін қамтамасыз ету, олардың спортпен шұғылдануына жағдай жасау және бос уақытын тиімді ұйымдастыру жөніндегі тапсырмаларының сапалы орындалуы аса маңызды екенін атап өтті.
Осыған байланысты жауапты мекемелерге аталған аумақты тұрғындардың сұранысына толық жауап беретін, қауіпсіз әрі заманауи демалыс кеңістігіне айналдыру міндеті жүктелді. Сондай-ақ абаттандыру жұмыстары барысында тұрғындардың ұсыныс-пікірлерін ескеріп, қоғамдық кеңістіктердің қолжетімділігі мен жайлылығын арттыру қажеттігі айтылды.
Жалпы, жұмыс сапары барысында Ербол Қарашөкеев барлық инфрақұрылымдық және абаттандыру жобаларының басты мақсаты халықтың тұрмыс сапасын жақсарту екенін атап өтті. Облыс әкімі жауапты мекемелер мен мердігер ұйымдарға құрылыс жұмыстарын сапалы орындауды, белгіленген мерзімдерді қатаң сақтауды және тұрғындардың қауіпсіздігі мен жайлылығын қамтамасыз етуді тапсырды. Сонымен қатар атқарылып жатқан жұмыстардың әр кезеңі тұрақты бақылауда болатынын жеткізіп, барлық жобалардың нәтижесі ең алдымен тұрғындардың игілігіне қызмет етуі тиіс екенін баса айтты.
